ՆԻՒԹԻ ՁԱՅՆԱԳՐԵԱԼ ՏԱՐԲԵՐԱԿԸ
Հանապազօրեայ ՀԱՑ - Հոգևոր քարոզներ 2020
Սիրելիներ, Սուրբ Ավետարանը հեղինակավոր գիրք է, որը վերբերում է նրան, ով իր ձեռքն է վերցնում կարդալու համար, որովհետև մարդու բնությունը մեղանչող և թաքցնող է, իսկ Ավետարանը՝ բացահայտող և շտկող ճշմարիտ գիրք է: Այդ պատճառով շատերը խուսափելով ճշմարտության բացահայտումից, չեն կարդում, որպեսզի չճանաչեն իրենց իրական կերպարը:
Տէր Յիսուս ասում է. «Եթէ դուք իմ ուսուցմանը հաւատարիմ մնաք, իմ ճշմարիտ աշակերտները կլինէք: Կճանաչէք ճշմարտութիւնը, եւ ճշմարտութիւնը ձեզ կազատի»:
Այս պարզ թվացող նախադասությունը բերենք մեր կյանքից ներս, և հասկանանք, թե ինչու մենք ճշմարիտ աշակերտներ չենք Տիրոջ համար, որովհետև հավատարիմ չենք Նրա ուսուցմանը,
այդ պատճառով չենք ճանաչում շճմարտությունը: Իսկ ճշմարտությունը չճանաչողը սխալի մեջ է: Երբեմն մենք մեր կարծիքով բարեպաշտ քրիստոնյա ենք համարում մեզ՝ մեր չափանիշներով: Բայց Ավետարանի չափանիշները այլ են մեր չափանիշներից: Հերովդեսն էլ իրեն հարգված էր համարում իր շրջապատում և հեղինակություն էր համարվում նրանց համար, որոնք իր իշխանության տակ էին, բայց Քրիստոս նրան աղվես անվանեց, որովհետև գիտեր նրա նենգ մտադրությունը և թաքնված դավադրությունը: Քանի որ ոչ ոք չի ուզում լսել ճշմարտությունը, և ճշմարտությունը խոսողին ուզում էին սպանել: Հիմա էլ շատ տարբեր չէ վերաբերմունքը ճշմարտախոսի հանդեպ, և այնքան ժամանակ տարբերի չի լինի, քանի դեռ մարդը թաքնված է մեղքի հետևում:
Հրեաներն էլ Հիսուսին փաստում էին, որ իրենք Աբրահամի որդիներ էին, սակայն Քրիստոս նրան սատանայի զավակներ անվանեց, քանի որ նրանց նենգությունն էլ հայտնի էր իրեն:
Նույնպես և մենք չենք կարող թաքնվել քրիստոնյա անվան տակ և ապրել աշխարհի օրենքներով, մեղքի մեջ և մեղքին ծառա:
Այդ է պատճառը, որ այսօր չի գտնվի գեթ մի պատասխանատու այր, որ կարողանա Հիսուս Քրիստոսի նման վստահ ասել. «Ձեզնից ո՞վ կյանդիմանի ինձ մեղքի համար»:
Շատ էին փորձում Նրան, բայց նրա վրա ոչ մի մեղք չգտնվեց: Հիսուս Քրիստոս խոսում էր բացարձակ իշխանությամբ և խոսում է վերին բաների մասին,
իսկ մեղքի մեջ տառապող մարդիկ չէին ընկալում նրա խոսքերի իմաստը և քարեր էին փնտրում նրա հարվածելու համար:
Ինչպե՞ս չհասկացան նրանք 2000 տարի առաջ և ինչպե՞ս մենք չենք հասկանում այսօր՝ այս խոսքերը, թե՝ «եթէ մէկը իմ խօսքը պահի, մահ չի տեսնի յաւիտեան»:
Մենք՝ մահից այսքան վախեցողներս, չենք ուզում խորապես ընկալել և հավատալ հավիտենական կյանքի իսկությանը, և կառչած ենք մնացել այս ժամանակավոր ու խաբուսիկ կյանքին:
Իսկ ժամանակը անցնում է առանց սպասելու, թե ե՞րբ կհասկանանք Քրիստոսի ճշմարիտ ուսուցումը:
Աղոթենք միասին:
Զքէն գոհանամք, Տէ'ր Աստուած մեր, որ շնորհեցեր մեզ հանգիստ քնոյ խաղաղութեամբ եւ զարթուցեալ` ժամանեցուցեր զմեզ կանխել յերկրպագութիւն ահաւոր եւ փառաւորեալ անուանդ քում սրբոյ: Տո'ւր մեզ, Տէ'ր, աղաչե'մք զքեզ, զմնացուած ցերեկս խաղաղութեամբ անցուցանել եւ զամենայն ժամանակս կենաց
պանդխտութեան մերոյ երկիւղիւ քո ամրացո' եւ պահեա': Որպէս զի, զգուշութեամբ եւ անարատ վարուք կրօնաւորեալք յայսմ աշխարհիս, ժամանեսցուք յանքոյթ եւ ի խաղաղ նաւահանգիստ յաւիտենական ի կեանսդ շնորհօք եւ մարդասիրութեամբ Տեառն մերոյ եւ փրկչին Յիսուսի Քրիստոսի, ընդ որում քեզ` Հօր եւ Հոգւոյդ Սրբոյ վայելէ փառք իշխանութիւն եւ պատիւ այժմ եւ
միշտ եւյաւիտեանս յաւիտենից. ամէն:
Օրվա ընթերցվածք.
Ավետարան ըստ Հովհաննեսի 8.31-59
31 Եւ Յիսուս հաւատացեալ հրեաներին ասաց. «Եթէ դուք իմ ուսուցմանը հաւատարիմ մնաք, իմ ճշմարիտ աշակերտները կլինէք: 32 Եւ կճանաչէք ճշմարտութիւնը, եւ ճշմարտութիւնը ձեզ կազատի»: 33 Նրան պատասխանեցին ու ասացին. «Աբրահամի որդիներ ենք եւ երբեք ոչ ոքի չենք ծառայել. ինչպէ՞ս ես ասում, թէ՝ ազատ կլինէք»: 34 Յիսուս պատասխանեց նրանց. «Ճշմարիտ, ճշմարիտ եմ ասում ձեզ, որ ամէն ոք, ով մեղք է գործում, մեղքին ծառայ է: 35 Եւ ծառան յաւիտեան տան մէջ չի մնում, իսկ որդին յաւիտեան մնում է: 36 Իսկ արդ, եթէ Որդին ձեզ ազատի, ճշմարտապէս ազատ կլինէք: 37 Գիտեմ, որ Աբրահամի որդիներ էք, բայց ուզում էք ինձ սպանել, որովհետեւ իմ խօսքը տեղ չունի ձեր մէջ: 38 Ես խօսում եմ այն, ինչ տեսայ իմ Հօր մօտ, իսկ դուք անում էք, ինչ ձեր հօրից էք լսել»: 39 Նրան պատասխանեցին ու ասացին. «Մեր հայրը Աբրահամն է»: Յիսուս նրանց ասաց. «Եթէ Աբրահամի որդիներ լինէիք, Աբրահամի գործերը կգործէիք: 40 Իսկ այժմ ուզում էք սպանել մի մարդու՝ ինձ, որ ձեզ ասացի ճշմարտութիւնը, որը լսել եմ իմ Հօրից. այդպիսի բան Աբրահամը չարեց. 41 դուք ձեր հօր գործերն էք անում»: Նրան ասացին. «Մենք պոռնկութիւնից չենք ծնուել. մեր Հայրը մէկ է՝ Աստուած»: 42 Յիսուս նրանց ասաց. «Եթէ Աստուած ձեր Հայրը լինէր, ինձ իրապէս կսիրէիք, որովհետեւ ես Աստծուց ելայ ու եկայ. եւ ոչ թէ ինքս ինձ եկայ, այլ նա ուղարկեց ինձ: 43 Ինչո՞ւ դուք իմ խօսածը չէք հասկանում. որովհետեւ իմ խօսքը չէք կարող լսել: 44 Դուք հօր կողմից սատանայի զաւակներ էք, եւ ձեր հօր ցանկութիւններն էք ուզում կատարել, թէեւ նա ի սկզբանէ մարդասպան էր եւ ճշմարտութեան մէջ չմնաց, որովհետեւ նրա մէջ ճշմարտութիւն չկար: Երբ որ նա սուտ է խօսում, ինքն իրենից է խօսում, քանի որ նա սուտ է եւ ստի հայր: 45 Իսկ ես, որ ճշմարտութիւնն եմ ասում, ինձ չէք հաւատում: 46 Ձեզնից ո՞վ կյանդիմանի ինձ մեղքի համար. եթէ ճշմարիտ եմ ասում ձեզ, ինձ ինչո՞ւ չէք հաւատում: 47 Ով Աստծուց է, Աստծոյ խօսքերն է լսում, իսկ դուք չէք լսում նրա համար, որ Աստծուց չէք»: 48 Հրեաները պատասխանեցին եւ ասացին նրան. «Մենք լաւ չե՞նք ասում, թէ սամարացի ես դու, եւ քո մէջ դեւ կայ»: 49 Յիսուս պատասխանեց եւ ասաց. «Իմ մէջ դեւ չկայ, այլ պատւում եմ իմ Հօրը, իսկ դուք անարգում էք ինձ: 50 Ես իմ փառքը չեմ փնտրում. կայ մէկը, որ այն փնտրում է եւ դատում: 51 Ճշմարիտ, ճշմարիտ եմ ասում ձեզ. եթէ մէկը իմ խօսքը պահի, մահ չի տեսնի յաւիտեան»: 52 Հրեաները նրան ասացին. «Այժմ իմացանք, որ քո մէջ դեւ կայ: Աբրահամը մեռաւ, նաեւ՝ մարգարէները, իսկ դու ասում ես, թէ՝ ով իմ խօսքը պահի, յաւիտեան մահ չի ճաշակի: 53 Մի՞թէ դու աւելի մեծ ես, քան մեր հայրը՝ Աբրահամը, որ մեռաւ. մեռան եւ մարգարէները. արդ, դու քեզ ո՞ւմ տեղ ես դնում»: 54 Յիսուս պատասխանեց. «Եթէ ես փառաւորեմ իմ անձը, իմ փառքը ոչինչ է. Հայրն է, որ ինձ փառաւորում է, եւ որի մասին դուք ասում էք, թէ՝ մեր Աստուածն է. 55 ու չէք ճանաչում նրան: Բայց ես ճանաչում եմ նրան. եւ եթէ ասեմ, թէ նրան չեմ ճանաչում, ձեզ նման ստախօս կլինեմ. բայց ես ճանաչում եմ նրան եւ նրա խօսքը պահում եմ: 56 Աբրահամը՝ ձեր հայրը, ցանկացաւ իմ աշխարհ գալու օրը տեսնել. տեսաւ եւ ուրախացաւ»: 57 Հրեաները նրան ասացին. «Դեռ յիսուն տարեկան չկաս դու եւ Աբրահամի՞ն ես տեսել»: 58 Յիսուս նրանց ասաց. «Ճշմարիտ, ճշմարիտ եմ ասում ձեզ. ես ե՛մ, նախքան Աբրահամի լինելը»: 59 Նրանք քարեր վերցրին, որ գցեն նրա վրայ, բայց Յիսուս խոյս տուեց եւ տաճարից ելաւ-գնաց:
Post Views: 3,155